நீங்கள் தேடியது "லாரி டிரைவர் பலி"

இரணியல்:

சாமியார்மடத்தை அடுத்த வியனூரைச் சேர்ந்தவர் ராஜேஷ். இவருக்கு சொந்தமாக லாரி உள்ளது.

ராஜேசுக்கு சொந்தமான லாரியில் மணவாளக்குறிச்சியைச் சேர்ந்த சேகர் என்பவர் டிரைவராக வேலை பார்த்து வந்தார். லாரியில் நேற்று ரப்பர் மரத்தடிகள் ஏற்றப்பட்டன.இதனை நெல்லை மாவட்டம் அம்பாச முத்திரம் பகுதிக்கு கொண்டு செல்லும்படி டிரைவர் சேகரிடம், லாரி உரிமையாளர் ராஜேஷ் தெரிவித்தார்.

இதையடுத்து சேகர், மரத்தடிகள் ஏற்றிய லாரியுடன் வியனூரில் இருந்து அம்பாசமுத்திரத்திற்கு புறப்பட்டார்.

தக்கலை-இரணியல் ரோட்டில் இன்று அதிகாலை 2 மணியளவில் லாரி சென்றது. ஆழ்வார்கோவில் அரசமூட்டு குளம் அருகே வந்தபோது லாரி திடீரென டிரைவரின் கட்டுப்பாட்டை இழந்து ரோட்டில் தாறு மாறாக ஓடியது.

இதில், சாலையின் திருப்பத்தில் இருந்த குளத்திற்குள் லாரி தலை குப்புற கவிழ்ந்தது.

அதிகாலையில் லாரி குளத்திற்குள் கவிழ்ந்ததை கண்ட அக்கம் பக்கத்தினர் இதுபற்றி இரணியல் போலீசாருக்கும், தக்கலை தீயணைப்பு துறையினருக்கும் தகவல் கொடுத்தனர். அவர்கள் விரைந்து வந்து குளத்திற்குள் கவிழ்ந்த லாரியை மீட்க முயன்றனர்.

லாரியில் மரத்தடிகள் இருந்ததால் அதனை உடனடியாக மீட்க முடியவில்லை. இதையடுத்து ராட்சத கிரேன்கள் கொண்டு வரப்பட்டன. அதன் மூலம் லாரி மீட்கப்பட்டது. அப்போதுலாரியை ஓட்டிச் சென்ற டிரைவர் சேகர் நீரில் மூழ்கி பலியாகி இருப்பது கண்டுபிடிக்கப்பட்டது.

லாரி குளத்தில் கவிழ்ந்ததும் அதில் இருந்த மரத்தடிகள் குளத்திற்குள் விழுந்தபோது டிரைவர் சேகர், அதன் இடையே சிக்கி கொண்டதும் இதனால் அவர் குளத்தில் மூழ்கி பலியாகி இருப்பதும் தெரிய வந்தது.

இதற்கிடையே லாரி குளத்தில் கவிழ்ந்த தகவல் அறிந்து லாரி உரிமையாளர் மற்றும் டிரைவர் சேகரின் உறவினர்கள் அங்கு விரைந்து வந்தனர். அவர்கள் பிணமாக மீட்கப்பட்ட சேகரின் உடலை பார்த்து கதறி அழுதனர். இது அங்கு கூடியிருந்தோர் மனதை உருக்குவதாக இருந்தது.

பார்வதிபுரம் மேம்பால பணி காரணமாக மார்த்தாண்டம் பகுதியில் இருந்து வரும் வாகனங்கள் அனைத்தும் இப்போது தக்கலை- இரணியல் சாலை வழியாக ஆசாரிபள்ளம் சென்று வருகிறது. இதனால் தக்கலை-இரணியல் சாலையில் வாகனப்போக்குவரத்து அதிகமாக இருக்கும். இன்று அதிகாலையில் இச்சாலையில் ஏற்பட்ட விபத்து காரணமாக சுமார் 8 மணி நேரம் போக்குவரத்து பாதிக்கப்பட்டது.

போக்குவரத்து போலீசார் இச்சாலையில் வந்த வாகனங்களை மாற்றுப்பாதையில் திருப்பி விட்டனர். #tamilnews

வேடசந்தூர்:

மதுரை செல்லூரில் இருந்து சேலத்துக்கு கடலை மிட்டாய் பெட்டிகளை ஏற்றிக்கொண்டு மினி லாரி சென்றது. மினி லாரியை செல்லூரை சேர்ந்த செல்வக்குமார் (வயது 30) என்பவர் ஓட்டினார். உதவியாளராக விக்னேஷ் (28) என்பவர் உடன் வந்தார். திண்டுக்கல்- கரூர் 4 வழிச்சாலையில் வேடசந்தூர் அருகே உள்ள கல்வார்பட்டி பகுதியில் லாரி சென்று கொண்டிருந்தது.

அப்போது திடீரென மினிலாரி பழுதாகியது. இதையடுத்து டிரைவர் செல்வக்குமார் மற்றும் உதவியாளர் விக்னேஷ் பழுதை சரிசெய்யும் பணியில் ஈடுபட்டிருந்தனர். அப்போது தூத்துக்குடியில் இருந்து பெங்களூருவுக்கு உப்பு ஏற்றிச்சென்ற கன்டெய்னர் லாரி, எதிர்பாராத விதமாக பழுதாகி நின்ற மினிலாரி மீது மோதியது.

மோதிய வேகத்தில் மினிலாரியை சில அடிதூரம் கன்டெய்னர் லாரி இழுத்து சென்றது. இந்த விபத்தில் மினிலாரி பலத்த சேதம் அடைந்தது. மேலும் லாரியில் இருந்த கடலை மிட்டாய் பெட்டிகளும் சிதறின. கண் இமைக்கும் நேரத்தில் நடந்த இந்த விபத்தில் பழுது பார்க்கும் பணியில் ஈடுபட்ட மினிலாரி டிரைவர் செல்வக்குமார் படுகாயம் அடைந்து சம்பவ இடத்திலேயே பரிதாபமாக இறந்தார். மேலும் உதவியாளர் விக்னேஷ் படுகாயம் அடைந்தார்.

இந்த விபத்து குறித்து தகவல் அறிந்ததும் கூம்பூர் போலீசார் சம்பவ இடத்துக்கு விரைந்து வந்தனர். பின்னர் படுகாயம் அடைந்த விக்னேசை மீட்டு சிகிச்சைக்காக வேடசந்தூர் அரசு மருத்துவமனைக்கு அனுப்பி வைத்தனர். மேலும் பலியான செல்வக்குமாரின் உடலையும் கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து கன்டெய்னர் லாரி டிரைவர் ஆந்திர மாநிலத்தை சேர்ந்த நாகேஷ் (25) என்பவரை கைது செய்து விசாரணை நடத்தி வருகின்றனர்.